Sigurður Sigurðsson hefur verið dæmdur í sex ára fangelsi fyrir tilraun til manndráps. Samkvæmt dómi sem féll í Héraðsdómi Austurlands þá réðst hann á annan mann vopnaður tveimur hnífum. Árásin var heiftúðug og lífshættuleg en svo virðist sem Sigurður hafi verið sturlaður af öfundsýki.
Í dómnum kemur fram að Sigurður hafi tekið því illa þegar maðurinn, fórnarlambið í málinu, tók saman við konu sem Sigurður var í sambúð með skamma stund. Hann sendi skilaboð sem einkenndust af heift. Samkvæmt fórnarlambinu þá var Sigurður skyldur konunni ættartengslum, en hafi þó verið ástfanginn af henni.
Í dómi segir: „Einnig segir í skýrslunni að brotaþoli hafi haft orð á því að ákærði hefði áður en atvik máls gerðust verið með líflátshótanir og að tilefnið hafi verið ástríða hans gagnvart konu, sem brotaþoli hafði þá tiltölulega nýlega verið byrjaður að leggja lag sitt við“.
Í dómi kemur fram að um kvöldið 10. júlí síðastliðinn, sem var miðvikudagur, hafi Sigurður drukkið ótæplega af áfengi ofan í lyfseðilsskyld lyf. Hann ákvað svo að ganga um eins og hálfs kílómetra leið að húsi fórnarlambsins. Sigurður sagðist ekkert muna frá atvikinu. Hann sagðist hafa verið að drekka bjór einsamall heima hjá sér að horfa á kvikmyndir. Síðasta sem hann mundi eftir var að hann hafi ætlað að fara út að reykja.
Lýsing fórnarlambsins af atvikinu er hrollvekjandi. Hann segist hafa verið spila tölvuleik á netinu en hafði aflæst útidyrahurðinni þar sem hann átti von á kærustunni sinni. „Við nefndar aðstæður hafi hann heyrt umgang í íbúðinni, en síðan séð hvar ákærði kom í áttina til hans inn ganginn. Brotaþoli skýrði frá því að er þetta gerðist hefði verið skuggsýnt, enda ljósin ekki verið tendruð í íbúðinni. Hann hafi ávarpað ákærða, en er ákærði hafi gengið nær hefði hann staðið upp úr stólnum og þá séð að ákærði hélt á hnífi í hægri hendi, sem hann otaði að honum. Vegna þessa hafi hann brugðist við og tekið í hægri hönd ákærða, en bar að þá hefði ákærði fyrirvaralaust komið með vinstri höndina og stungið öðrum hnífi, sem hann hafi haldið á í þeirri hendi, í háls hans,“ segir í dómi.
Þrátt fyrir þetta þá náði fórnarlambið að flýja af vettvangi. Hann náði að hlaupa til nágranna síns en hann hafi misst mikið blóð. Félagi fórnarlambsins var að spila við hann á netinu og heyrði því hvað gerðist. Því er lýst svo í dómi: „Vitnið bar að á meðan á þessum leik stóð hefði verið líkast því sem einhver hefði brugðið brotaþola þar sem vitniðhafi heyrt hann segja: „Úff“ en í framhaldi af því hafi það heyrt brothljóð. Vegna þessa kvaðst vitnið hafa ályktað að hundur brotaþola hefði komið þarna við sögu, en að auki hafi það heyrt brotaþola segja: „What a fuck.“ Vitnið kvaðst ekki hafa heyrt frekara hljóð, en bar að brotaþoli hefði ekki svarað netskilaboðum.“
Meðal gagna málsins voru skilaboð Sigurðar til bæði konunnar og fórnarlambsins: „Segir í gögnum að slík skilaboð hafi m.a. verið frá 15. janúar 2019, en efnið hafi varðað nefnd sambúðarslit þeirra og enn fremur ástarjátningu ákærða. Að auki er tíunduð í skilaboðum frásögn ákærða í júnímánuði þess efnis að hann hefði leitað sér læknishjálpar og fengið ávísað lyfjum vegna kvíða og ofhugsunar, og að hann hefði í framhaldi af því haft orð á því að líðan hans hefði batnað. Að auki eru svofelld skilaboð frá ákærða til vitnisins tíunduð í gögnum lögreglu, dagsett 5. júlí nefnt ár: „Fer a […](skemmtistaður) i kvold, ef þú lætur sjá þig þá sting ég þig.““
Líkt og fyrr segir þá var Sigurður dæmdur í sex ára fangelsi en til frádráttar refsingunni kemur gæsluvarðhald hans frá 11. júlí 2019. Hann þarf svo að greiða fórnarlambinu tæplega tvær milljónir í miskabætur.