„Ég hef aldrei séð annað eins,“ segir Íslendingur sem varð vitni að því þegar japanskir ferðamenn sem heimsóttu Bláa Lónið á laugardaginn komu að innbrotsþjófi í bílaleigubíl þeirra. Fjöldi fólks varð vitni að atvikinu en einn þjófanna var kominn með töluvert af eigum ferðamannanna í hendur sér þegar þeir japönsku komu auga á hann. Ferðamennirnir báðu nærstadda að hringja á lögregluna á meðan þeir reyndu að koma þjófinum niður í jörðina og halda honum.
Þjófurinn, sem var þeldökkur á hörund og talaði mjög óskýra ensku að sögn vitna, var þó töluvert stærri og þyngri en japönsku ferðamennirnir og náði því, eftir einhver handalögmál, að slíta sig lausan. Ferðamennirnir gáfust þó ekki upp og hlupu á eftir honum þvert yfir bílaplanið.
„Ég var bara nýkominn sjálfur upp úr Bláa Lóninu og var að setja sundfötin aftan í skott hjá mér þegar ég heyri öskrað; Please call the police. Ég lít þá upp og sé tvo ferðamenn frá Asíu bókstaflega slást við þriðja manninn, sá var þeldökkur á hörund og töluvert stærri í vexti en hinir tveir,“ segir Íslendingurinn og bætir við að fjöldi fólks hafi orðið vitni að átökunum en flestir hafi ekki þorað að stíga inn í af ótta við frekari átök við þjófinn.
„Þetta gerðist líka bara svo hratt því stuttu eftir að ég tek eftir þessum slagsmálum þá nær þjófurinn að slíta sig lausan og tekur svo á rás þvert yfir bílaplanið í átt að hvítum Volkswagen Polo. Í þeirri bifreið virtist vitorðsmaður þjófsins bíða en ferðamennirnir gáfust ekkert upp og hlupu á eftir honum og inn í Polo-inn. Ég hleyp þarna að þeim og sé hvar ferðamennirnir reyna að halda í þjófinn og nánast eru að slást við hann aftan í þessum hvíta Polo sem síðan allt í einu keyrir af stað.“
Íslendingurinn segir ferðamennina tvo hafa kastast út úr bílnum á ferð og þjófarnir síðan keyrt áfram áleiðis Grindavíkurveginn í átt til Reykjavíkur.
„Þeir slösuðust sem betur fer ekki mikið. Skrámur hér og þar. Ég tók niður númerið á bifreiðinni, lét þá fá það og símanúmerið hjá lögreglunni á Suðurnesjum. Þeir voru að heimsækja Ísland frá Japan og voru svo gott sem nýkomnir til landsins þegar brotist er inn í bílinn þeirra. Einhverjir óku á eftir þjófunum en meira veit ég ekki,“ segir Íslendingurinn.
Annar sem hafði samband við DV vegna málsins staðfestir frásögn Íslendingsins en sá hafði einnig tekið hluta af atvikinu upp á myndskeið í símanum sínum. Myndskeiðið er ekki mjög skýrt en sýnir tvo bláklædda ferðamenn í handalögmálum við bíl þjófanna, rétt áður en honum er ekið af stað og þeir kastast út.
DV hefur undir höndum bílnúmerið á umræddum bílaleigubíl en samkvæmt uppflettingu í ökutækjaskráningu er um að ræða bílaleigubíl frá AVIS. Samkvæmt heimildum DV var bílaleigubílnum skilað deginum eftir þjófnaðinn og hafa forsvarsmenn AVIS engar upplýsingar um atvikið – enginn hafi haft samband við þá til þess að óska eftir upplýsingum um leigutaka bílsins og hefur hann nú verið leigður aftur út.
Samkvæmt upplýsingum frá lögreglunni á Suðurnesjum þá mættu lögreglumenn frá embættinu á vettvang og ræddu við ferðamennina. Ekki hafi verið haft samband við bílaleiguna, til þess að finna út hver þjófarnir eru, þar sem engin kæra hafi verið lögð fram og má því draga þá ályktun að japönsku ferðamennirnir hafi haldið ferðalagi sínu um landið áfram þrátt fyrir áfallið á laugardaginn. Samkvæmt sömu upplýsingum keyrðu þjófarnir tómhentir af vettvangi og því má ætla að japönsku ferðamennirnir hafi náð eigum sínum áður en þeir fingralöngu spóluðu út af bílaplaninu.
