Framkvæmdir eru fyrirhugaðar á jörðinni Hvammsvík í sunnanverðum Hvalfirði. Eigandi jarðarinnar er Skúli Mogensen, fyrrverandi forstjóri og eigandi hins fallna flugfélags WOW air. Hlaðnar verða baðlaugar, byggt þjónustuhús og lögð bílastæði á svæðinu.

Frá þessu er greint í héraðsblaðinu Vesturland.

Í skipulagslýsingu vegna nýs deiliskipulags á svæðinu segir:

„Leitast verður eftir að nota íslensk efni og íslenska list eftir fremsta megni. Laugarnar verða allar hlaðnar úr grjóti sem finnst víðsvegar í fjörunni eða á jörðinni. Húsið verður lagt torfi og það falið að mestu leyti frá götu og þjóðvegi. Gert er ráð fyrir fimm til sex heitum og köldum laugum sem liðast út í víkina og fyllast og tæmast með flóði og fjöru. Einnig er gert ráð fyrir tveim gufuböðum og hvíldaraðstöðu sem jafnframt er hugsað sem skjól. Laugarnar yrðu misdjúpar en þrjár þeirra yrðu alltaf að mestu nothæfar, einnig á flóði.“