Tilkynnt var um tvö innbrot með skömmu millibili í Árbænum í gærkvöldi. Annars vegar tilkynnti húsráðandi upp úr klukkan 19 í gærkvöldi að farið hefði verið inn á heimili hans. Hann hafði brugðið sér af bæ í þrjár klukkustundir og virðast innbrotsþjófarnir hafa haft á brott með sér skartgripi.

Tæpri klukkustund síðar var tilkynnt um annað innbrot en þar hafði húsráðandi verið að heiman allan daginn og því ekki vitað hvenær farið var inn. Ekki liggur fyrir hverju var stolið úr því innbroti.

Á sjötta tímanum í gær kom húsráðandi á Seltjarnaresi að ókunnugu pari í bílskúrnum við heimili sitt þar sem þau voru búin að taka verkfæri og fleira. Húsráðandinn bað parið vinsamlegast um að skila mununum og fóru þau án þess að taka neitt með sér. Að sögn lögreglu ógnuðu þau húsráðanda með eggvopni þegar þau fóru. Parið fannst ekki þrátt fyrir leit.