Arngrímur Brynjólfsson, skiptstjóri hjá Samherja, taldi sig ekki hafa látið skip sitt stunda veiðar á lokuðu svæði eins og Fiskistofa Namibíu sakar hann um. Segir hann ásökunina var mikil vonbrigði því hann hafi aldrei á 49 ára ferli sínum fyrr verið vændur um ólöglegar veiðar. Arngrímur hefur sent frá sér yfirlýsingu vegna málsins. Í henni kemur fram að hann þurfti að gista fangageymslur í Namibíu í nótt. Hann vonast til að málið leysist farsællega innan tíðar en yfirlýsing hans er eftirffarandi

Yfirlýsing frá Arngrími Brynjólfssyni skipstjóra Heinaste

Skipið Heinaste kláraði löndun í fyrradag. Eftir að skipið hafði klárað löndun var ég boðaður til fundar við Fiskistofu Namibíu sem stýrir veiðum í landinu. Þar komu fram ásakanir þess efnis að skipið hefði farið inná á lokað svæði til veiða.

Ég vill taka fram að á mínum 49 ára ferli til sjós, þar af yfir 34 ár sem skipstjóri, hef ég aldrei verið sakaður um hafa brotið af mér í starfi á neinn hátt. Þessi veiðiferð átti að vera sú síðasta á ferlinum og eru það mér mikil vonbrigði að verða fyrir þessum ásökunum nú.

Mér vitandi hefur skipið ekki verið sakað um brot af þessu tagi áður og kemur ásökunin sjálfum mér á óvart enda er þess gætt af kostgæfni að veiða aldrei á þeim svæðum sem eru lokuð hverju sinni.

Allajafna þegar skip er sakað um að hafa veitt innan lokaðs svæðis í lögsögu Namibíu er skipstjóri leiddur fyrir dómara og sleppt samdægurs. Vonast ég til að það taki ekki langan tíma að leiða málið til lykta og eftir því sem ég kemst næst hefur öllum málum af þessu tagi lokið með sektargreiðslu teljist það sannað að skip hafi í raun stundað veiðar innan lokaðs svæðis.

Langt var liðið á daginn þegar samtalið við Fiskistofu fór fram. Það tókst því ekki að koma málinu fyrir dómara samdægurs og þurfti ég því að gista fangageymslur eina nótt. Í gærmorgun fór málið svo fyrir dómara, mér var sleppt og vonast ég til þess að málið leysist endanlega innan skamms.

Virðingarfyllst, Arngrímur Brynjólfsson