Lögreglunni á höfuðborgarsvæðinu var tilkynnt um umferðarslys í Kópavogi á sjötta tímanum síðdegis í gær. Annar ökumaðurinn, sá er olli tjóninu, gekk burt frá vettvangi með opna bjórdós í hönd en var handtekinn síðar.
Í skeyti frá lögreglu kemur fram að maðurinn sé grunaður um akstur undir áhrifum fíkniefna og áfengis og vörslu fíkniefna. Hann var vistaður í fangageymslu vegna rannsóknar málsins. Meiðsl tjónþola og tveggja farþega í bíl hans voru minniháttar. Báðar bifreiðar voru fluttar af vettvangi með dráttarbifreið.
Þessu til viðbótar voru þrír ökumenn teknir úr umferð í gærkvöldi og í nótt vegna gruns um akstur undir áhrifum áfengis og/eða fíkniefna.
