Lögreglan á höfuðborgarsvæðinu handtók konu í Hlíðahverfi um tvö leytið í nótt. Að sögn lögreglu hafði konan ruðst inn í íbúð hjá ókunnugum en ekki liggur fyrir hvað henni gekk til. Hún var í annarlegu ástandi og var vistuð í fangageymslu lögreglu.

Fyrr um kvöldið, eða rétt fyrir klukkan 23, handtók lögregla mann í Háaleitis- og Bústaðahverfi en ítrekuð afskipti höfðu verið af manninum fyrr um kvöldið þar sem hann var að fara inn í hús eða hótel og leggjast til svefns. Maðurinn var vistaður í fangageymslu sökum ástands.

Á tíunda tímanum í gærkvöldi varð umferðaróhapp á Reykjanesbraut í Garðabæ. Ökumaður hafði þar misst annað framdekkið undan bifreið sinni en fyrr um daginn hafði hann látið setja nagladekkin undir. Bifreiðin var flutt af vettvangi með dráttarbifreið aftur á dekkjaverkstæðið og var ökumaðurinn aðstoðaður til síns heima.