Lögreglan á höfuðborgarsvæðinu handtók tvo menn á tólfta tímanum í gærkvöldi vegna gruns um þjófnað og tilraun til þjófnaðar í Breiðholti og Árbæ í gærkvöldi.

Rétt fyrir klukkan níu var tilkynnt um þjófnað í Breiðholti en þar hafði unglingur leyft mönnum að hringja úr síma sínum. Mennirnir hlupu á brott með símann og komust undan. Rúmum klukkutíma síðar var tilkynnt um tvo menn sem höfðu veist að manni á göngustíg og krafið hann um úlpu, peninga og síma. Að sögn lögreglu náði maðurinn að komast undan án þess að afhenda eigur sínar. Mennirnir fundust ekki þrátt fyrir mikla leit en voru handteknir svo í þriðja málinu.

Á tólfta tímanum var tilkynnt um tvo menn í Hraunbæ sem höfðu rænt síma og fleiru frá þrettán ára dreng. Mennirnir voru handteknir skömmu síðar og vistaðir í fangageymslu lögreglu vegna rannsóknar málsins. Að sögn lögreglu eru þetta sömu menn og eru grunaðir í málunum tveimur í Breiðholti.