Einar Þór Sigurðsson skrifar frá Istanbúl:
Tyrkir eru ekki búnir að gleyma uppþvottaburstamálinu sem kom upp í Leifsstöð í sumar. Íslendingar komu reyndar hvergi þar nærri því um var að ræða belgískan ferðamann sem ætlaði að slá á létta strengi með með gríni sem reyndist misheppnað.
Þá voru Tyrkir ósáttir við að þurfa að fara í gegnum landamæraeftirlit, þeir vildu fara beint upp á hótel en biðu út í flugvél um nokkurt skeið.
Erik Hamren, landsliðsþjálfari Íslands var spurður um málið á fréttamannafundi í Istanbúl. ,,Í Istanbúl og í Antalya fenguð þið góðar móttökur. En Tyrkir fengu slæmar móttökur í júní. Hvað finnst þér um það?,“ sagði fréttamaður frá Tyrklandi.
,,Það er langt síðan það var og ég vil ekki tala um það,“ sagði Hamren sem kom ekki nálægt málinu
,,Þetta er ekki undir okkur komið og þetta var okkur óviðkomandi. Ég sagði að við ættum að fókusa á leikinn en ekki það sem gerðist þarna.“