Handboltamaðurinn Sveinn Aron Sveinsson hefur sent frá sér yfirlýsingu í kjölfar dóms vegna líkamsárásar sem hann hlaut fyrir skömmu. Sveinn Aron, sem hefur unnið Íslandsmeistari með Val í handbolta, réðst á mann á Októberfest fyrir utan Háskóla Íslands haustið 2017. Samkvæmt dómi sparkaði Sveinn meðal annars í höfuð mannsins þar sem hann lá í jörðinni. Atvikið átti sér stað aðfaranótt laugardagsins 9. september 2017, á bílastæði við Sæmundargötu í Reykjavík. Sveinn réðst á manninn, sem féll til jarðar, og sparkaði ítrekað í höfuð hans.
Valur sendi frá sér yfirlýsingu í gær þar sem hafnað var frekara samstarfi við handboltamanninn og samningum við hann rift. Sveinn Aron hefur nú sent frá sér yfirlýsingu þar sem hann harmar framkomu sína:
„Ég harma að Valur hafi dregist inn í umræðu um dóm sem ég hlaut í síðustu viku vegna líkamsárásar sem átti sér stað fyrir meira en tveimur árum síðan. Allan minn íþróttaferil hef ég lagt hart að mér fyrir Val, þar sem hjartað mitt hefur slegið undanfarin tuttugu ár. Á þeim tíma hef ég gengið í gegnum hæðir og lægðir með félaginu og óska þess heitast að þótt samstarfi mínu við félagið sé nú lokið verði sigranna minnst sem við náðum í yngri flokkum sem og í meistaraflokki þar sem Íslandsmeistaratitillinn 2017 stendur hæst. Eftir að hafa hampað titlinum ákvað ég að leggja skóna á hilluna og var því ekki leikmaður Vals þegar ég sýndi ófsakanlegt dómgreindarleysi og ósæmilega hegðun, sem ég viðurkenndi skýlaust fyrir dómi og tek núna út refsingu fyrir. Sú byrði mín á ekki að skyggja á íþróttafélagið mitt og stuðningsmenn þess.“