Karlmaður á fimmtugsaldri var dæmdur í fimm mánaða skilorðsbundið fangelsi fyrir Héraðsdómi Vestfjarða. Maðurinn var dæmdur sekur um kynferðisbrot og brot gegn barnaverndarlögum.
Maðurinn stundaði það að taka myndefni af börnum í búningsklefum, bæði stelpum og strákum. Hann tók myndir af alls átta fórnarlömbum á símann sinn en hann teygði hann yfir skilrúm milli búningsklefa karla og kvenna.
Vísir greindi frá því fyrr á þessu ári að maðurinn hafi tekið myndbönd af stelpum sem fæddar voru á árunum 2003 til 2008 en einnig tók hann myndband af stráki sem var í sundi með móður sinni. Strákurinn var fæddur árið 2013.
Fórnarlömb mannsins kröfðust samtals 10,5 milljóna í bætur en maðurinn var einungis dæmdur til að greiða samanlagt tvær milljónir í bætur. Auk þess þarf hann að greiða um 1,5 milljón í sakarkostnað.