„Varasamt að vera á ferðinni og samgöngutruflanir líklegar. Auknar líkur á foktjóni“ Þetta segir á vef Veðurstofu Íslands fyrir kvöldið á Faxaflóa. Stormurinn er áætlaður milli 20:30 og 23:00 í kvöld. Vindhraði gæti náð 20-28 metrum á sekúndu og vindhviður allt að 40 metrum á sekúndu við fjöll
Viðvörun fyrir svæðið hefur verið breytt úr gulri yfir í appelsínugula.
Eins hefur verið gefin út appelsínugul viðvörun fyrir Suðurland frá 20-22:30 í kvöld.
Eitthvað af innanlandsflugi hefur verið fellt niður.
Gul viðvörun er í gildi fyrir næstum allt landið. Á höfuðborgarsvæðinu er spáð varasömum sviptivindum í efri byggðum og við háar byggingar og er talið varasamt að vera á ferðinni á Suðurlandi.
Íbúum á Suðausturlandi er bent á að gæta að niðurföllum vegna mikillar rigningar. Eins verða auknar líkur á skriðuföllum.
Ekkert ferðaveður verður á miðhálendinu til 01:00 í nótt.
Fólki er bent á að huga að hlutum sem geta fokið og valdið tjóni sem og að varast ferðalög á ökutækjum sem eru viðkvæm fyrir vindi.
Uppfært 15:30
Upphaflega stóð orðið „vondviðri“ í fyrirsögn. Það orð er víst ekki til og biðst blaðamaður velvirðingar á því. Orðinu eða óorðinu hefur nú verið skipt út fyrir orðið „stormur“ sem blaðamaður hefur verið fullvissaður um að sé vissulega til.