„Fann þetta og u.þ.b. 10 samskonar harðfiskbúta í vikunni í afgitum garði við lóðarmörk Langeyrarvegar 10 og Skerseyrarvegs 2 í Hafnarfirði“
Þetta skrifar Egill Örn nokkur inn á Hundasamfélagið á Facebook sem DV fékk heimild til að deila með lesendum.
Nöglum hafði verið komið fyrir í harðfisksbitum sem hafði verið dreift víð og dreif í afgirtum garði hans. Þessu komst Egill að þegar hundurinn hans, þýskur fjárhundur, var kominn með einn bitann í kjaftinn.
„Búið er að troða nöglum inn með fiskinum og koma þessu fyrir á lóðinni þannig að lítið bæri á. Hundurinn var kominn með einn bút í kjaftinn þegar ég sá að hann var með eitthvað óvenjulegt og athugaði málið. Lóðin er afgirt fyrir almenningi í a.m.k. 30 metra radíus frá staðnum þar sem þetta fannst.“
Egill spyr hvort aðrir hundaeigendur hafi lent í svipuðu og hvetur fólk til að skoða garða „þar sem gæludýr virðast ekki geta verið óhult í eigin garði“
Egill tilkynnti atvikið til lögreglu sem hefur málið til rannsóknar. Þeir sem geta veitt upplýsingar um málið er bent á að hafa samband við lögreglu.
Í samtali við Hringbraut segir Egill það ótrúlegt hvað réttindi gæludýra sé lítill. „Ég á engin börn en hundurinn er mér sem barn og það myndi eitthvað gerast í kerfinu ef það væri byrlað svona fyrir barni“
Færsla Egils vakti mikinn óhug meðal hundaeigenda og átti fólk vart orð yfir grimmdinni sem gæludýrum er sýnd með þessu athæfi. Þar könnuðust sumir við sambærileg tilvik þar sem hættulegum aðskotahlutum eða eitri hafði verið komið fyrir í mat í Hafnarfirði og skilinn eftir á víðavangi.