Karlmaður á fimmtugsaldri, Bjarni Björnsson, hefur verið dæmdur í 12 mánaða skilorðsbundið fangelsi fyrir sérstaklega hættulega líkamsárás sem átti sér stað á Kalda bar í Reykjavík síðastliðinn maímánuð. Bjarni sló glasi í höfuð og háls mannsins þar með alvarlegum afleiðingum.

Samkvæmt dómi hlaut maðurinn skurð og tætt sár með mörgum flipum vinstra megin á hálsi upp við og á eyra. Maðurinn var afmyndaður eftir árásina en sauma þurfti 30 spor. Ofan á það þá hlaut maðurinn „skerta heyrn, stífleika í baki, kláða og dofa í og útfrá vinstra eyrnasnepli, varanlegan áverka á andlitstaug, sem meðal annars olli minni hreyfigetu og krafti í andliti vinstra megin og augnþurrki vinstra megin,“ líkt og segir í dómi.

Bjarni játaði brot sitt skýlaus og sagðist þjakaður af samviskubiti. „Kvaðst  hann  stöðugt  hugsa  um  verknaðinn  og  afleiðingar  hans,  svo  og hvernig  hann  brást  við  umrætt  sinn  af  algeru  hugsunarleys,“ segir í dómi. Bjarni hefur auk þess ekki áður verið sætt refsingu.

Dómari benti þó á að árásin hafi verið lífhættuleg og líkt og fyrr segir hlaut maðurinn varanlegan skaða af henni. Bjarni var jafnframt dæmdur til að greiða fórnarlambinu ríflega eina milljón króna í miskabætur.