Íslendingur á fimmtugsaldri hefur verið dæmdur í sjö mánaða fangelsi í Noregi fyrir auðkennisþjófnað, skjalafals og fjársvik í sumar.
Frá þessu greinir Morgunblaðið í dag en þar segir að maðurinn hafi notað persónuupplýsingar kærustu sinnar til að svíkja út upphæð sem nemur tíu milljónum íslenskra króna.
Maðurinn er sagður hafa svikið upphæðina úr norskum bönkum, meðal annars í formi vaxtahárra lána. Þá er hann sagður hafa notað bankaupplýsingar konunnar til að fjárfesta í nýju rúmi með greiðsludreifingu.
„Á meðan kærasta hans svaf í rúminu að nóttu til notaði hann persónuupplýsingar hennar til að skuldsetja hana enn frekar,“ segir í frétt Morgunblaðsins sem vísar í frétt NRK í Noregi.
Maðurinn mun hafa hlotið dóm hér á landi fyrir skjalafals og fjársvik, síðast árið 2018.