Hvalrekar hafa verið nokkuð áberandi síðustu misseri en þingmaðurinn Andrés Ingi Jónsson sendi sjávarútvegsráðherra fyrirspurn varðandi hvalreka í lok september á þessu ári.
„Tíðar fréttir af hvalreka síðustu misserin hafa varla farið fram hjá nokkrum. Til að fá skýrari mynd af því sem virðist af vera nokkuð ör þróun miðað við fjölda frétta hef ég lagt fram fyrirspurn á þingi. Þar bið ég ráðherra að taka saman yfirlit yfir hvalreka undanfarin 10 árin. Þá spyr ég hvort skoðuð hafi verið tengsl við hávaða af mannavöldum – allt frá hvalaskoðunarbátum til kafbátaleitarvéla. Loks spyr ég hvort gerðar séu krufningar og sýnataka á strönduðum hvölum. Það verður áhugavert að sjá svörin og vonandi að þau varpi ljósi á stöðuna í hafinu umhverfis landið.“
Hvalreki er ekki lengur sá hvalreki sem hann var eitt sinn, þegar hagnýta mátti afurðir dýrsins og borða kjötið. Í raun telst hvalreki nú vera byrði á sveitarfélögin en ekki búbót, þar sem ýmiskonar kostnaður við að færa og farga dýrunum fellur á þau. Þá má ekki lengur nýta kjötið eða afurðir dýrsins og þarf samþykki frá viðhlítandi stofnunum hins opinbera við alla ákvarðanatöku um hvalhræ.