Lögreglan á Suðurlandi hafði í mörg horn að líta í liðinni viku en athygli vekur hversu mörg mál tengd dýrum komu upp.

Í dagbók lögreglu kemur fram að laus Husky-hundur í Vík hafi tekið sig til og étið gæs sem varð á vegi hans á dögunum. Málið er til meðferðar hjá lögreglu og sveitarfélagi en í skeyti lögreglu er þess getið að þessi sami hundur sé sagður hafa drepið kött þegar hann sleit sig frá eiganda sínum fyrr á árinu.

Á Hellu var ekið á svartan og hvítan kött sem drapst við það. Kötturinn var ómerktur og segir lögregla að líklega hafi verið um að ræða villkött.

Á Þykkvabæjarvegi var ekið á hross. Mikið tjón varð á bílnum en ekki er vitað um ástand hrossins þar sem það hljóp út í myrkrið eftir áreksturinn.

Á Meðallandsvegi var ekið á lamb síðastliðinn laugardag. Umtalsvert tjón varð á ökutækinu og þarf ekki að fjölyrða um ástand lambsins.

Þá hljóp laus hundur í veg fyrir bifreið á Suðurlandsvegi við Laugardæli þannig að ökumaður hennar þurfti aðnauðhemla til að koma í veg fyrir að lenda í dýrinu. Hundurinn hljóp af vettvangi og eigandi var hvergi sjáanlegur.