Stýrihópur á vegum umhverfisráðherra hvatti Vegagerðina til að nota illgresiseyðinn Roundup svo hægt verði að draga úr áhrifum alaskalúpínu og kerfils í íslenskri náttúru. Þetta var meðal þess sem kom fram í svörum við fyrirspurn Hringbrautar sem greindi frá málinu. 

Stýrihópurinn var skipaður af Svandísi Svavarsdóttur, þáverandi umhverfisráðherra og núverandi heilbrigðisráðherra. Auk hennar sátu í stýrihópnum Jón Gunnar Ottóson, forstjóri Náttúrufræðistofnunar Íslands og Sveinn Runólfsson, fyrrverandi landgræðslustjóri. Þessi stýrihópur hvatti til notkunar á illgresiseyðinum sem hefur verið bannaður í fjölmörgum löndum sökum þess að vera talinn krabbameinsvaldandi. 

Í svari Vegagerðarinnar til Hringbrautar kom fram að notað hafi verið um 1.300 lítra af illgresiseyðinum á árunum 2009 til 2016. Starfsmenn Vegagerðarinnar staðfestu við Hringbraut að um 1000 lítrum af vatni hafi verið blandað í hverja 5 lítra af illgresiseyðinum. Þess vegna má álykta að um 260 þúsund lítrum af vökva sem innihélt þennan krabbameinsvaldandi illgresiseyði hafi verið dreift víðsvegar um Ísland. 

Í illgresiseyðinum Roundup er að finna efnið Glyphosate sem Alþjóðaheilbrigðismálastofnunin telur að geti valdið krabbameini. DV greindi frá því fyrr á þessu ári að Roundup illgresiseyðirinn hafi þá og áður verið í sölu á Íslandi en þá var það meðal annars að finna í Garðheimum. Í frétt Hringbrautar er vakið athygli á því að um 9 þúsund dómsmál hafi verið höfðuð í Bandaríkjunum gegn framleiðanda Roundup illgresiseyðisins.

Fjöldi starfsmanna Vegagerðarinnar, bæði núverandi og fyrrverandi, staðfestu það við Hringbraut að þeir hafi ekki fengið nein sérstök fyrirmæli um það að notast við hlífðarbúnað á meðan þeir blönduðu illgresiseyðinum við vatn. Matvælastofnun tekur það fram á heimasíðu sinni að sérstaklega sé efnið hættulegt þeim sem vinna við að blanda það.

„Já, sérstaklega þeim sem vinna með glýfosat, við að blanda og úða því eða vinna á ökrum með erfðabreyttum jurtum sem eru úðaðir oft á vaxtartímanum. Það má búast við að einhverjar leifar séu enn til staðar þegar matvælin koma á diskinn okkar.“