Tveir voru fluttir á slysadeild eftir eldsvoða í kjallaraíbúð í Hlíðunum í nótt. Tilkynning um málið barst klukkan 01:31 og voru tveir menn í íbúðinni þegar lögregla kom á vettvang. Þriðji maðurinn komst út að sjálfsdáðum.
Að sögn lögreglu náðust mennirnir út og voru fluttir á bráðadeild en ekki er vitað um ástand þeirra. Efri hæðir hússins voru rýmdar meðan slökkvistarf stóð yfir en íbúar fengu að fara í íbúðir sínar þegar slökkvistarfi lauk. Eldsupptök liggja ekki fyrir.
Í frétt mbl.is er haft eftir Gunnlaugi Jónssyni, aðalvarðstjóra hjá slökkviliðinu á höfuðborgarsvæðinu, að snör handtök sjúkraflutningamanns hafi skipt sköpum í málinu. Hann tæmdi úr slökkvitæki og slökkti mesta eldinn sem logaði í anddyri íbúðarinnar.