Nú undir morgun var tilkynnt um mannlausa bifreið á Suðurnesjum sem flautaði ótt og títt og raskaði næturró íbúa í nærliggjandi fjölbýlishúsum. Lögreglumaður aftengdi rafmagn bifreiðarinnar og lét hún þá af flautinu. Þetta kemur fram í skeyti frá lögreglu.
Þar segir einnig að lögreglan á Suðurnesjum hafi kært á þriðja tug ökumanna fyrir of hraðan akstur um helgina. Sá sem hraðast ók mældist á 138 kílómetra hraða þar sem hámarkshraði er 90 kílómetrar á klukkustund. Ökumannsins bíður 150 þúsunda króna sekt. Annar ökumaður sem mældist á 119 kílómetra hraða var grunaður um ölvunarakstur.
Þá voru höfð afskipti af ökumanni sem aldrei hafði öðlast ökuréttindi og gekkst viðkomandi við brotinu.
