Ökumaður sem var að teygja sig eftir vatnsflösku lenti í árekstri á Reykjanesbraut í vikunni. Þetta kemur fram í fréttatilkynningu frá Lögreglunni á Suðurnesjum. Maðurinn tók augun af veginum er hann var að teygja sig eftir flöskunni með þeim afleiðingum að hann lenti á bíl sem kom úr gagnstæðri átt. Í tilkynningunni er einnig greint frá öðru óhappi sem varð í umdæminu í vikunni:

„Nokkuð hefur verið um umferðaróhöpp í umdæmi lögreglunnar á Suðurnesjum það sem af er vikunni. Bifreið ökumanns, sem ók inn á rangan vegarhelming á Reykjanesbraut þegar hann var að teygja sig eftir vatnsflösku og leit þá af veginum, hafnaði á bifreið sem kom á móti. Ekki urðu slys á fólki en bifreiðirnar voru fluttar af vettvangi með dráttarbifreið.

Þá ók annar ökumaður aftan á bifreið sem var kyrrstæð á gatnamótum. Ökumaðurinn sem ekið var aftan á kenndi eymsla eftir áreksturinn.“