Nokkur erill var hjá lögreglunni á höfuðborgarsvæðinu í gærkvöldi og nótt ef marka má dagbók lögreglu.

Tilkynnt var um innbrot í bifreið í hverfi 105 klukkan korter yfir fimm í gær og stuttu síðar var bifreið stöðvuð í hverfi 110. Ökumaður er grunaður um akstur undir áhrifum fíkniefna.

Rétt fyrir klukkan sex var óskað eftir aðstoð á veitingastað í miðborginni en þar var einstaklingur til vandræða. Einstaklingurinn var fjarlægður af staðnum. Rúmlega sex var tilkynnt um umferðaróhapp í Efra-Breiðholti.

Þegar klukkan var langt gengin í átta var bifreið stöðvuð í hverfi 105 en ökumaður reyndist sviptur ökuréttindum vegna fyrri afskipta lögreglu. Laust fyrir hálf níu var ökumaður tekinn í Garðabæ, grunaður um akstur undir áhrifum áfengis.

Rétt rúmlega níu varð umferðaróhapp í hverfi 105 og rúmleg hálf tíu var ökumaður stöðvaður í hverfi 110, grunaður um akstur undir áhrifum fíkniefna. Auk þess var hann ekki með ökuréttindi.

Rétt eftir tíu var bifreið stöðvuð í Kópavogi, en hún reyndist ótryggð. Þá reyndist ökumaður vera með útrunnin ökuréttindi. Rúmlega eitt í nótt var ökumaður stöðvaður í Garðabæ, grunaður um akstur undir áhrifum fíkniefna.

Rétt fyrir þrjú í nótt var tilkynnt um einstakling að brjóta rúður í verslun í miðbænum. Einstaklingurinn var farinn þegar lögregla kom á vettvang. Laust fyrir fjögur var óskað eftir lögreglu í Garðabæ vegna einstaklings sem berji reglulega á hús tilkynnanda. Einstaklingurinn var farinn þegar að lögregla kom á vettvang.