Aldís Hilmarsdóttir, framkvæmdastjóri húsnæðisbótasviðs hjá Íbúðalánasjóði, rannsakar Eimskip og forstjóra þess, Gylfa Sigfússon, í stífri aukavinnu fyrir Samkeppniseftirlitið. Þetta kemur fram í frétt í Viðskiptamogganum í dag. Á undanförnu einu og hálfu ári hefur Aldís þegið að meðaltali um 440 þúsund krónur á mánuði fyrir þessa aukavinnu, eða samtals um 7,5 milljónir.
Aldís er fyrrverandi yfirmaður í fíkniefnadeild lögreglunannar en auk þess hefur hún starfað hjá sérstökum saksóknara og sem lögreglufulltrúi í efnahagsbrotadeild ríkislögreglustjóra.
Þessi aukavinna Aldísar er hluti af rannsókn Samkeppniseftirlitsins á Eimskip sem staðið hefur yfir í tíu ár. Eimskip hefur mótmælt rannsókninni og sagt Samkeppniseftirlitið vera að stunda lögreglurannsókn gegn félaginu. Talið er að Aldís hafi verið fengin til verkefnisins vegna reynslu sinnar af rannsóknum efnahagsbrota. Eimskip bendir á að Samkeppniseftirilitinu sé óheimilt að stunda lögreglurannsóknir.
Einnig kemur fram í frétt Morgunblaðsins að Aldís hefur verið að rannsaka Eimskip fyrir Samkeppniseftirlitið frá árinu 2017 en hún hóf störf hjá Íbúðalánasjóði í byrjun árs 2018.