Von er á austanstormi á suðurströndinni í dag. Vindurinn mun ná sér á strik um hádegisbil og eru gular viðvaranir í gildi frá hádegi til miðnættis. Vindhviður geta farið yfir fjörutíu metra á sekúndu og verða þær einna sterkastar undir Eyjafjöllum og í Öræfum.
Annars staðar á landinu er ekki útlit fyrir storm en austanáttin verður stíf. Með stífum vindi fylgir rigning um landið sunnan- og austanvert.
Á morgun dregur úr vindi víðast hvar þó að líklega verði stormur í Öræfum fram eftir degi og einhver væta um landið austanvert, eins og fram kemur í hugleiðingum veðurfræðings hjá Veðurstofu Íslands.
Nánar má skoða veðurspá á Veðurvef DV, en hér fyrir neðan fylgja veðurhorfur næstu daga.
Á miðvikudag:
Austan 8-13 m/s, en 13-20 SA-lands. Þurrt að kalla á landinu, en rigning með köflum A-ast. Hiti 4 til 11 stig, mildast SV-til.
Á fimmtudag:
Norðaustan 8-15 m/s. Rigning SA- og A-lands, skýjað en úrkomulítið norðan til, léttskýjað um landið V-vert. Hiti 2 til 8 stig, mildast syðst.
Á föstudag:
Hægt minnkandi norðaustanátt. Skýjað og úrkomulítið fyrir austan, en bjart með köflum V-lands. Hiti 1 til 6 stig yfir daginn, en víða líkur á næturfrosti.
Á laugardag:
Fremur hæg breytileg átt og skýjað með A-ströndinni, annars bjart á köflum. Kólnar heldur.
Á sunnudag:
Suðvestlæg átt og fer að rigna V-lands. Hiti 0 til 7 stig.
Á mánudag:
Útlit fyrir breytilega átt og úrkomusamt veður um allt land. Hlýnar allra syðst.