Almar Albertsson, 33 ára Íslendingur búsettur í Danmörku, hefur verið dæmdur þar í landi í eins og hálfs árs fangelsi. Dómari ákvað að vísa Almari ekki úr landi vegna sterkra tengsla hans við Danmörku, en hafði á orði að ef hann bryti aftur af sér þá mætti hann reikna með brottvísun.

Samkvæmt dönskum fjölmiðlum þá var Almar dæmdur fyrir að hafa gengið berserksgang í Suður-Jótlandi. Hann er sagður hafa verið á stolnum Hyundai Santa Fe þann 4. júlí síðastliðinn þegar lögregla stöðvaði hann í Skovby, bæ austan við Sønderborg. Þegar lögreglumenn reyndu að handtaka hann þá ók hann af stað með þeim afleiðingum að tveir lögregluþjónar drógust með bifreiðinni einhvern spöl.

Eftir þetta hófst stórhættuleg eftirför lögreglu sem minnti helst á Hollywood-kvikmynd eða tölvuleik samkvæmt lýsingu. Lögregla virðist hafa elt Almar nær allan daginn í Suður-Danmörku. Hann sagður hafa stofnað lífi fólks í hættu í bænum Sønderborg en þar ók hann í gegnum grindverk og inn í garð. Í bænum Liljehaven ók Almar fyrst á húsvegg og síðan á tvo lögreglubíla.

Þessi árekstrar stöðvuðu þó ekki Almar því hann hélt áfram í sama bæ og ók í gegnum limgerði. Að lokum klessti hann á húsvegg í götunni Arnkilgade. Hann var í kjölfar þess færður á spítala með heilahristing. Almar var dæmdur fyrir fjölda brota en auk þess sem hefur verið nefnt hér þá var hann undir áhrifum fíkniefna og Hyundai-bifreiðin virðist ekki hafa verið fyrsti bíllinn sem hann stal.

Uppfært: Þýðingarvilla varð til þess að DV taldi Almar hafa keyrt lengri vegalengd en hann gerði í raun. Eftirförin átti sér öll stað á eyjunni Als en þar er bærinn Sonderborg. Atburðarrásin var þó engu minni hættulegri því margir litlir bæir eru á eyjunni. Auk þess voru margir á ferli á góðum sumardegi.