Karen Halldórsdóttir, bæjarfulltrúi Sjálfstæðisflokksins í Kópavogi, steig fram í helgarblaði Fréttablaðsins, og ræddi mál bróður síns, Þorsteins Halldórssonar, en hann er dæmdur barnaníðingur. DV hefur ítrekað fjallað um það mál. Það vekur athygli að Karen upplýsir að Sjálfstæðismenn hafi vitað um brot hans og hafi fundað stíft um málið.
Í viðtalinu segir Karen að eitt kvöld hafi hún fengið heimsókn frá félaga sínum. „Hann biður mig að setjast niður. Þessari stund gleymi ég aldrei. Hann sagði mér frá máli, sem hann vissi að tengdist bróður mínum og varðaði nálgunarbann sem hann átti að hafa fengið á sig vegna kynferðisbrots og að drengurinn væri mjög ungur. Ég gjörsamlega fraus og gat ekki meðtekið hvað sagt var. Ofan á þetta komst ég að því að þetta mál hefði verið rætt innan Sjálfstæðisflokksins í smá tíma og ég upplifði mikil svik, að hafa ekki verið látin vita af þessu fyrr og mögulega þá getað komið í veg fyrir það sem gerðist seinna.“
Sjá einnig: Barnaníðingurinn Þorsteinn sleppur fyrr út
Þorsteinn var síðar handtekinn fyrir að nauðga pilti á gistiheimili. „Eftir þetta tók við ofsalega snúinn tími. Ég þurfti að hafa samband við hina bræður mína sem einfaldlega trúðu þessu ekki. Að lokum fengum við staðfestingu á þessu og þá tók við það verkefni að segja foreldrum okkar og börnunum hans frá,“ segir Karen í viðtalinu.
Hún kvartar undan því að fjölmiðlar hafi tengt Þorstein við Sjálfstæðisflokkinn. Hann hafði þó verið virkur í flokknum lengi og gegndi formennsku í málfundafélagi flokksins. Eftir að mál hans kom upp fjarlægði flokkurinn nafn hans af vefsíðu sinni. „Ég á tvær dætur og sem foreldri get ég aldrei samþykkt ofbeldi á börnum í hvaða mynd sem það kemur. Ég hef setið í barnavernd og velferðarráði og alltaf látið mig velferð barna varða og barist fyrir réttindum þeirra. Allt í einu var ég tengd brotamanni gegn börnum og umræðan um Sjálfstæðisflokkinn blandaðist alltaf einhverra hluta vegna inn í þetta. Eins og þar væri eitthvert skjól fyrir slíka menn frekar en annars staðar, algerlega firrt umræða en fór mikinn á þessum tíma,“ segir Karen í viðtalinu.