Hrossakjötsát virðist vera misjafnlega viðkvæmt eftir löndum. Löng hefð er fyrir hrossakjötsáti hér á landi og margir veitingastaðir eru með hrossalundir á matseðlinum. Átján ára gömul norsk stúlka hefur fengið yfir sig morðhótanir og henni verið sagt að hún ætti aldrei að fá að halda dýr eftir að hún sagði frá því á Facebook-síðu sinni að hún hefði lagt hestinn sinn sér til munns. Fjallað er um málið í fjölmörgum fjölmiðlum víða um heim, meðal annars á vef Daily Mail.
Pia Olden heitir stúlkan og hún greinir frá því að taka hafi þurft hestinn af lífi árið 2018 vegna sjúkdóms. Eftir það var kjöt af honum geymt í frysti á heimilinu. Fyrir ekki löngu síðan var kjötið af hestinum síðan haft í matinn og lýsti Pia því á Facebook-síðu sinni hvernig hún hafði matreitt hestinn sinn. Færslan vakti gífurlega hörð viðbrögð og hatursskilaboðum rigndi yfir Piu.
Pia bendir á að það sé ekki verra að hún borði hestinn sinn en að hann sé grafinn í jörðu þar sem ormar nærist á holdi hans.
Þess má geta í þessu samhengi að íslenskir hestamenn leggja sér gjarnan hrossakjöt til munns og enginn kippir sér upp við það. Sem dæmi má nefna að hestamannafélagið Hörður boðar til mikillar hrossakjötsveislu þann 9. nóvember næstkomandi. Sjá nánar hér. Ekkert í auglýsingunni bendir þó til þess að veislugestir séu að fara að leggja sér sína eigin hesta til munns. Kannski er það helst það sem fór fyrir brjóstið á höturum hinnar ungu Piu frá Noregi.