Neytendastofa hefur sektað Húsasmiðjuna um 400.000 krónur vegna auglýsingar fyrirtækisins í Fréttablaðinu þann 18. júní í sumar. Þar var auglýstur Tax Free afsláttur án þess að tilgreint væri prósentuhlutfall afsláttarins.
Í frétt um úrskurðinn á vefsíðu Neytendastofu segir:
„Með fyrri ákvörðun Neytendastofu hafði stofnunin bannað Húsasmiðjunni að auglýsa Tax Free afslátt með þessum hætti.
Við meðferð málsins kom fram að afslátturinn hafi komið fram í nær öllum auglýsingum félagsins en fyrir mistök hafi auglýsingar farið út sem innihéldu ekki prósentuhlutfall afsláttarins.
Í ljósi þess að Húsasmiðjan hafi brotið gegn fyrri ákvörðun Neytendastofu taldi stofnunin nauðsynlegt að sekta félagið. Var því lögð 400.000 kr. stjórnvaldssekt á Húsasmiðjuna fyrir brotið.“
Úrskurðinn sjálfan má lesa hér. Auglýsingin var talin brjóta gegn reglum Neytendastofu um útsölur og aðra sölu þar sem selt er á lækkuðu verði. Fjórða grein reglnanna er svohljóðandi:
„Þegar veittur er prósentuafsláttur reiknast hann af fyrra verði. Taka skal fram hvert prósentuhlutfall lækkunarinnar er og skal tilgreina skýrt fyrra verð. Lækki verð vöru eða þjónustu enn frekar á meðan á útsölu eða annarri sölu stendur, sbr. 1. gr., skal koma skýrt fram hvort aukinn afsláttur reiknast frá upphaflegu eða lækkuðu verði. Sé veitturaukinn afsláttur þegar sex vikur eru liðnar af útsölu skal líta á fyrra útsöluverð sem fyrra verð, sbr. 2. og 3. gr.“