Lögreglan á höfuðborgarsvæðinu hafði hendur í ári tveggja manna og einnar konu um kvöldmatarleytið í gær. Fólkið er grunað um rán, þjófnað, nytjastuld bifreiðar, akstur undir áhrifum áfengis og fíkniefna og eignaspjöll.
Í skeyti frá lögreglu kemur fram að fólkið sé grunað um að hafa rænt bifreið af manni. Ráðist var á hann, farsími hans tekinn og hann svo skilinn eftir slasaður á vettvangi. Bifreiðinni var meðal annars ekið yfir umferðareyjur, gegn rauðu ljósi, utan í aðra bifreið, á göngustígum þar sem börn voru nærri og í gegnum garð við íbúðarhús. Fólkið var handtekið og vistað í fangageymslu vegna rannsóknar málsins.
Fleiri mál komu inn á borð lögreglu í gærkvöldi og í nótt. Á níunda tímanum í gærkvöldi var tilkynnt um konu sem hafði orðið viðskila við hóp af fólki á sæþotum sem voru á ferð frá Akranesi til Reykjavíkur. Farartæki konunnar hafði misst afl og kom hún um það bil klukkustund síðar að landi. Konan var orðin köld en annars í lagi.
Á öðrum tímanum í nótt var bifreið stöðvuð á Kringlumýrarbraut. Ökumaðurinn gaf upp rangt nafn og er grunaður um akstur bifreiðar undir áhrifum fíkniefna, ítrekaðan akstur sviptur ökuréttindum. Farþegi í bifreiðinni er grunaður um hilmingu en farþegi og ökumaður víxluðu nöfnum við afskipti lögreglu.