Íbúi í Vesturbæ Reykjavíkur hefur boðað til mótmælafundar í kjölfar þess að ekið var á barn við gatnamót Hringbrautar og Meistaravalla í morgun. Gönguljós eru á gatnamótunum, sem eru nálægt Vesturbæjarskóla, en þess er krafist að gangbrautavörður verði á staðnum milli kl.8 og 8:30 á virkum morgnum. Ólöf Jakobsdóttir boðaði til mótmælanna í morgun:
„Í ljósi þess að slys varð í morgun á Hringbraut höfum við maðurinn minn Jóhannes Tryggvason ákveðið að mótmæla endalausu aðgerðarleysi skóla og skóla og frístundasviðs Reykjavíkur við að koma börnum yfir þessa götu örugglega og munum standa gönguvarðavakt á gönguljósunum við Hringbraut hjá Vesturbæjarskóla milli klukkan 08.00&08.30 í fyrramálið,“ segir Ólöf í færslu í Fésbókarhópnum Vesturbærinn.
Margir aðrir íbúar eru uggandi vegna málsins. Segir tónlistarkonan Þórunn Antonía Magnúsdóttir að hún geti ekki hætt að hugsa um barnið sem var ekið á: „Ég get ekki hætt að hugsa um elsku barnið sem varð fyrir bíl á Hringbrautinni í morgunn. Ég verð svo ótrúlega hissa og reið þegar ég sé fullorðið fólk keyra á þessari götu daglega á leið minni með 4 ára stelpunni minni í leikskólann eins og það sé í einhverri keppni. Ég get ekki talið þau skipti sem einhver keyrir yfir á rauðu eða er að tala í símann. Lífið skiptir miklu meira máli heldur en að komast í vinnunni á réttum tíma á met hraða. Ég vona að barnið sé á batavegi,“ segir Þórunn Antonía.
Guðrún Birna Brynjarsdóttir vill halda íbúafund vegna málsins, segir hún í fundarboði að það sé kominn tími til að gera eitthvað í málefnum Hringbrautar. Hafa margir boðað komu sína á fundinn.