Á laugardaginn birti Morgunblaðið skoðanapistil eftir Hall Hallsson, fyrrverandi fjölmiðlamann, þar sem hann fer yfir víðan völl en megin inntakið snýr að samsæri „glóbalista“ gegn vestrænni siðmenningu. Hann ýjar að því að hryðjuverkin 11. september séu samsæri og að „glóbalistarnir“ upphefji alræðisöfl og „beiti samkynhneigðum fyrir vagn sinn“. Á Twitter hefur fjöldi þjóðþekktra einstaklinga tjáð sig um þennan pistil en þar á meðal eru núverandi og fyrrverandi stjórnmálamenn og fjölmiðlamenn. Nær allir ýmist segja hann veikan á geði, gera grín að pistlinum eða gagnrýna hann harðlega.
Hallur fordæmi sérstaklega auðmanninn George Soros sem virðist vera potturinn og pannan í þessu samsæri. „Yfirlýst markmið Sorosar er að knésetja Bandaríkin. Það er lykilhlekkur í samsæri glóbalista 21. aldar að gera Bandaríkin að hverju öðru héraði í alheimsríkinu. Evrópa er þegar sem bikar á hillu. Til þess að breyta lýðsamsetningu hafa milljónir ólöglegra karla streymt til Vesturlanda í nafni opinna landamæra. Það er til marks um ógnartök glóbalista á fjölmiðlum að FT útnefnir Soros mann 2018. Lofgrein FT um Soros minnir á Þjóðviljalygi 20. aldar,” segir Hallur í pistlinum og bætir því svo við að Donald Trump hafi verið kosinn til að verja bandaríska lýðveldið og vestræna siðmenningu.
Umræðan á Twitter hófst þegar Þórður Snær Júlíusson, ritstjóri Kjarnans, deildi mynd af pistlinum og skrifar: „Í þessari grein segir m.a: 9/11 var samsæri til að breyta lýðsamsetningu Vesturlanda, Donald Trump er síðasta brjóstvörn vestrænnar siðmenningar og Rauði krossinn er ekkert annað en tól siðlausra glóbalista til að eyðileggja heiminn. Þetta var birt í Mogganum í morgun.“
Færslan hefur nú fengið tæplega þrjú hundruð læk en margir tjá sig í athugasemd. Silja Bára Ómarsdóttir, dósent við Stjórnmálafræðideild Háskóla Íslands, segir til að mynda: „Þetta er galið. En mér skilst reyndar að ég sé glóbalisti á launum hjá Soros (nemendur mínir lásu það á netinu) svo hvað veit ég. Væri gaman að finna reikninginn!“
Karl Sigurðsson, Baggalútur og fyrrverandi borgarfulltrúi, segir: „Er Hallur alveg hættur að tappa?“ Hanna Katrín Friðriksson, formaður þingflokks Viðreisnar, skrifar svo: „Vondir globalistar þeysa um heiminn til að leggja hann og allt sem gott er undir sig og eyðileggja, með aðstoð falsfréttamanna, á vagni sem dreginn er af samkynhneigðum. Er ég að ná þessu nokkurn veginn rétt?“ Þessi svarar Þórður Snær: „Nokkurn veginn sýnist mér. Kv. Falsfréttamaðurinn.“
Samflokkskona Hönnu, Þorgerður Katrín Gunnarsdóttir, formaður Viðreisnar, nefnir sérstaklega ábyrgð Morgunblaðsins, en hún segir: „Það blað á Vesturlöndum með hvað taumlausustu aðdáunina á Trump.“ Þórður Snær svarar og bendir á að Hallur hafi verið fyrsti gestur Hrafnaþings eftir að þátturinn færði sig yfir á vefsjónvarp mbl.is. Þar ræddi Hallur meðal annars Skaupið og gaf meðal annars í skyn að höfundar þess séu pervertar.
Atli Fannar Bjarkason, fyrrverandi ritstjóri Nútímans, svarar Þorgerði og Þórði og skrifar: „Skelfilegt að vera ráðinn á Moggann en vinna allt í einu hjá Breitbart.“ Friðjón Friðjónsson, áhrifamaður í Sjálfstæðisflokknum, kemur Morgunblaðinu til varnar og spyr hvort þeir viti ekki að þetta innsend grein. Því svarar Þórður Snær: „Auðvitað vitum við það. En það er líka þannig að flestir fjölmiðlar áskilja sér rétt til að birta ekki slíkar sem eru fullar af órökstuddum staðleysum og/eða samsæriskenningum. En það er greinilega ekki þannig hjá Mogganum.“
Sumir gefa einfaldlega í skyn að Hallur sé veikur á geði. Kjartan Valgarðsson, Samfylkingarmaður og fyrrverandi formaður innkauparáðsins, segir: „Sorglega galið.“ Það tekur Halldór Auðar Svansson, fyrrverandi borgarfulltrúi Pírata , upp og bætir við: „Mjög sorglegt. Manninum fer hrakandi.“
DV náði tali af Halli sem vildi lítið tjá sig um málið. „Menn verða náttúrulega sárreiðir sannleikanum,“ segir Hallur.
Nú eru sumir sem efast um geðheilsu þína.
„Eru einhverjir að því? Það er ekki ónýtt. Ég þarf s.s. að fá heilbrigðisvottorð.“
Er einhver ástæða til að efast um geðheilsu þína?
„Ekki draga mig ofan í þennan drullupytt. Ég hef ekkert um svona að segja,“ segir Hallur og bætir við að hann sé á leið í göngutúr.
Í þessari grein segir m.a: 9/11 var samsæri til að breyta lýðsamsetningu Vesturlanda, Donald Trump er síðasta brjóstvörn vestrænnar siðmenningar og Rauði krossinn er ekkert annað en tól siðlausra glóbalista til að eyðileggja heiminn. Þetta var birt í Mogganum í morgun. pic.twitter.com/GQ7VKVuwmp
— Þórður S. Júlíusson (@thordursnaer) January 5, 2019