Góður rómur var gerður að nýársávarpi Guðna Th. Jóhannessonar, forseta Íslands. Forsetinn fór um víðan völl en áhrifaríkt þótti þegar hann vakti athygli á tíðum sjálfsvígum íslenskra ungmenna. „Við erum að missa ungt fólk. Í þessu landi velmegunar eru sjálfsvíg helsta dánarorsök ungra karlmanna. Í þessu landi frelsis og framfara verða of mörg ungmenni háð fíkniefnum og ávanalyfjum,“ sagði forsetinn. Fannst mörgum skjóta skökku við að nokkrum klukkustundum síðar sæmdi Guðni Agnesi Önnu Sigurðardóttur, áfengisframleiðanda á Árskógsströnd, fálkaorðunni. Rétt er að minna á að orðunefnd, sem Guðni Ágústsson veitir forstöðu, ákveður hverjir skuli fá vegsemdina.