„Ertu eitthvað vankaður í höfðinu,“ spurði Jón Halldór Eðvaldsson körfuboltasérfræðingur Kjartan Atla Kjartansson, þáttastjórnanda Körfuboltakvölds Dominos, þegar sá síðarnefndi spurði hvað sérfræðingunum fyndist um veganúar. Umræðurnar fóru af stað í lokin á Framlengingunni í þætti gærkvöldsins á Stöð 2 Sport. Þeir Kjartan Atli, Jón Halldór og Fannar Ólafsson voru búnir að fara yfir stöðuna í Dominos-deildinni þegar spurningin um hvað sérfræðingunum finnst um veganúar, mánuð þar sem fólk á ekki að neyta dýraafurða.

Það sást að Fannar vissi ekki hvað á sig stóð veðrið, spurði hann: „Hvað er það?“

Jón Halldór var ekki sáttur: „Ertu eitthvað…? Veistu það… besti vinur minn asnaðist til að aula því út úr sér við konuna sína „eigum við ekki bara að sleppa því að drekka allan bjór bara í janúar?“. Gæinn, hann er bara búinn að vera svona…“ [Jón Halldór hristi hendurnar].

Fannar benti í Kjartan Atla og sagði: „Þetta er sykurfall hjá honum. Ég veit alveg hvernig þetta er, hann er ekki búinn að borða núna í hálfan sólarhring og svona blaður sem er að koma út úr þér núna… Vegan.“

Listaði Fannar upp nokkur atriði: „Núvitund er ekki til. Vegan er blaður og bull skilurðu. Algjört rugl.“ Fannar breytti um rödd og sagði: „Ég ætla ekki að fá mér sósu þar sem að einhver dýraafurð gæti hugsanlega… þeigiði. Guð minn góður.“

Jón Halldór skaut þá inn: „Það er fleira sem við þurfum að taka fyrir hérna. Kulnun!“ Þeir sögðu svo báðir: „Kulnun í starfi er leti!“

Fannar sagði svo í hæðnistón: „Tengdapabbi, mjólkurbílstjóri í 48 ár. Já já! Ég er bara með kulnun í starfi! Þegiði! Andskotans bull! Þess vegna eru slysasjóðir VR bara tæmdir! Þunglyndi? Þú ert bara í tölvunni allt of lengi fíflið þitt!“

Hér má horfa á Framlenginuna. Æsingurinn hefst eftir rúma fimm og hálfa mínútu.