Lögreglan á Vestfjörðum hafði afskipti af unglingum sem léku sér á Pollinum í Skutulsfirði í dag. Meðfylgjandi mynd var tekin við það tilefni.
Í tilkynningu sem lögreglan birti á Facebook-síðu sinni kemur fram að þar sem Pollurinn er ísilagður þessa dagana sé tilefni til að minna á þá hættu sem getur skapast við leik á hafís.
„Mikilvægt er að foreldrar vari börn og unglinga við því að vera að leik á ótraustum ísnum, það þarf vart að ræða hvaða afleiðingar það getur haft í för með sér falli þau í gegnum þunnt íslagið.
Verði einhver þó fyrir því óhappi að falla í gegnum ís er gott að hafa í huga þessi ráð sem Miðstöð Slysavarna Barna bendir á,“ segir lögreglan en um er að ræða þessi ráð:
– Snúa þér að bakkanum og halla þér að ísnum.
– Teygja hendurnar uppá ísinn og sparka.
– Ekki standa upp þegar þú kemst uppá á ísinn. Liggðu á ísnum og rúllaðu þér frá gatinu.
– Aðstandendur ættu ekki að hlaupa út á ísinn því þá brotnar hann enn meir og þau detta líka í vatnið.
– Ef sá sem dettur kemst ekki upp úr vatninu án aðstoðar, skal kasta til hans reipi, stöng eða trjágrein og toga hann uppúr.
Ef viðkomandi dettur í vatnið eða sjóinn þegar kalt er í veðri kólnar hann hratt og þarf því tafarlaust að hafa samband við Neyðarlínu og óska eftir aðstoð.