Stígamót, samtök gegn kynferðisofbeldi, vinna nú að því að kæra niðurfelld ofbeldismál til Mannréttindadómstóls Evrópu. Eiga samtökin í samvinnu við sex konur og einn lögfræðing um þetta. Samtökin hvetja fleiri konur til að bætast í hópinn en fundin hefur verið leið til að fjármagna málareksturinn. Tilkynning sem Stígamót hafa sent frá sér vegna málsins er eftirfarandi:
„Á Stígamótum erum við í samstarfi við sex konur og brilliant lögfræðing um að kæra niðurfelld ofbeldismál til mannréttindadómstóls Evrópu. Málin verða að hafa verið felld niður síðustu sex mánuði og það þarf að kæra niðurfellinguna til saksóknaraembættisins. Við viljum kortleggja mynstrið í niðurfellingunum og getum bætt konum í hópinn. Við höfum fundið leið til þess að fjármagna kærurnar þannig að konur eiga ekki að bera neinn kostnað af málarekstrinum, Þær gætu hins vegar fengið skaðabætur frá íslenska ríkinu, falli dómur í mannréttindadómstólnum. Endilega látið þetta berast til þeirra kvenna sem gætu viljað vera með. Því fleiri, því sterkari.“