Elis Poulsen, frétta- og dagskrárgerðarmaður RÚV í Færeyjum, er látinn. Elis Poulsen var landsmönnum að góðu kunnur fyrir fréttapistla sína frá Færeyjum en hann talaði góða íslensku. Elis lést fyrir aldur fram en hann var 67 ára. Elis var afar vinsæll í fjölmiðlastétt fyrir vönduð vinnubrögð sín, sem og hjálpsemi og gott viðmót.
Bogi Ágústsson, fyrrverandi fréttastjóri RÚV og núverandi frétta- og dagskrárgerðarmaður hjá stofnuninni, minnist Elisar í stuttri færslu í dag. Hann ritar:
„Bárust í morgun þær sorgarfréttir að Elis Poulsen, frétta-og dagskrárgerðarmaður ríkisútvarpsins í Færeyjum, er látinn eftir erfið veikindi. Upp á Tá, föstudagsþættir hans í færeyska útvarpinu nutu fádæma vinsælda. Elís var einstaklega ljúfur og yndislegur maður og var sérlega greiðvikinn maður, Elis átti marga vini og kunningja á Íslandi, enda gekk hann í skóla hér og systir hans, Marentza, býr hér. Ég er stoltur af því að hafa verið í hópi vina hans á Íslandi. Myndin er frá einni af mörgum heimsóknum í RÚV. Elis hjálpaði mér ótal sinnum við fréttaöflun í Færeyjum, lóðsaði okkur Karl Sigtryggsson í heimsóknum okkar. Elis verður sárt saknað.“