Ingvar Smári Birgisson, lögmaður og formaður SUS, er ekki sáttur við þjónustu Smart Parking, þjónustuaðila í bílageymslu, en hann fékk bílinn sinn skemmdan til baka úr umsjá fyrirtækisins eftir utanlandsferð. Smart Parking hefur lofað að bæta fyrir skemmdirnar en ekkert hefur orðið úr efndum. Ingvar, sem vill ekki ræða málið við fjölmiðla, gaf DV leyfi til að birta FB-færslu sína um málið og mynd af skemmdunum, er eftir því var leitað. Í færslunni segir hann:
„Ég kvarta ekki daglega yfir þjónustu fyrirtækja en í dag ætla ég að gera undantekningu. Í lok apríl ákvað ég að nýta mér þjónustu Smart parking. Þeir bjóða upp á að sækja bílinn við Keflavíkurflugvöll, geyma hann einhvers staðar á meðan utanlandsferð stendur og skutla svo bílnum að flugstöðinni við heimkomu. Þegar ég kom að bílnum eftir heimkomu, hafandi tekið við lyklunum við útganginn á flugstöðinni, var búið að keyra utan í bílinn minn á meðan hann var í umsjá Smart Parking.
Ég kvartaði rakleiðis í starfsmanninn á svæðinu og benti honum á skemmdirnar. Hann lofaði öllu fögru og benti mér á að senda tölvupóst. Það gerði ég og fékk jákvæðan tón fyrst um sinn. Nú eru liðnir tveir mánuðir og Smart Parking hefur ekki svarað mér þrátt fyrir fjölda ítrekana og símtala.
Ég hvet fólk til þess að hugsa sig tvisvar um áður en þjónusta Smart Parking er notuð. Þú færð kannski ekki bílinn aftur í heilu lagi.“
Í 19. grein laga um þjónustukaup segir:
„Seljandi þjónustu ber áhættu af tjóni, eða rýrnun, sem verður áður en hann skilar af sér verki nema hann sýni fram á að tjónið sé vegna atvika sem ekki eru á hans valdi.“
Raunar má skilja af færslu Ingvars að Smart Parking hafi játað skaðabótaskyldu sína en illa virðist ganga að fá þá til að standa við fyrirheit þar um.
