Sif Sigmarsdóttir, pistlahöfundur, ætlar að styðja Málfrelsissjóðinn. Hún segir að dómkerfinu megi ekki beita til að þagga niður í þolendum því það sé óumdeilanleg staðreynd að glæpir eigi sér stað þótt aldrei verði nokkur sakfelldur fyrir þá. Þetta kemur fram í pistli hennar í Fréttablaðinu.
Sif bendir á lagið Me and a gun eftir tónlistarkonuna Tori Amos sem hún samdi um það er henni var nauðgað. Tori kærði þó aldrei brotið og enginn var sakfelldur. Sif veltir fyrir sér hvort það þýði að Tori megi ekki syngja um að hafa verið nauðgað. Má hún tala um það að henni hefi verið nauðgað ? Má Sif skrifa um það í Fréttablaðinu?
„Ef tré fellur í skógi og enginn er nærri, heyrist þá hljóð?
Ástæða skrifa Sifjar eru nýfallnir dómar yfir Hildi Lilliendahl Viggósdóttur og Oddnýju Aradóttur fyrir ærumeiðingar í garð tveggja manna sem sakaðir voru um nauðganir í sérútbúinni nauðgunaríbúð í hlíðunum. Í kjölfar dómanna var stofnaður Málfrelsissjóður sem er ætlað að styðja við þolendur og baráttufólk sem fjalla opinskátt um kynferðisbrot. Mun sjóðurinn aðstoða þá aðila við að standa straum af kostnaði ef ummæli þeirra verða kærð.
Sif varð fyrir auðkennisþjófnaði fyrir skömmu. „Ég var fórnalamb auðkennisþjófnaðar fyrir skömmu þar sem ég bý í London. Óprúttnum aðilum tókst að plata þjónustufulltrúa í bankanum mínum til að senda mér nýtt debetkort. Þeir vöktuðu póstkassann minn og stálu kortinu úr kassanum þegar það barst. Siðan fóru þeir í hraðbanka og tæmdu reikninginn minn“
Sif hafði samband við bankann sem endurgreiddi henni stolnu upphæðina. Því næst reyndi hún að hafa samband við lögreglu en var greint af símsvara að lögreglan gæti ekki rannsakað minniháttar mál sökum anna.
„Ég kærði ekkert til lögreglu. Enginn var dæmdur. Enginn efaðist þó um að þrjú hundruð pundum hefði verið stolið af reikningnum mínum“
Þrátt fyrir að Sif kærði ekki brotið sem hún mátti þola þá efaðist aldrei neinn um frásögn hennar. Kynferðisbrot eiga sér stað, það er staðreynd. Það er líka staðreynd að fæst slík brot eru kærð og enn færri brot sem ljúka með sakfellingu geranda. Þýðir það að aðeins þolendur þeirra sakfelldu megi tjá sig á meðan aðrir þolendur þurfa að þegja?
„Hver hefst réttur manns til æru og hvar lýkur rétti konu til að tjá sig um atburði engin lífs? Þetta er flókið. Þetta er ekki svart og hvítt. En það gengur ekki að dómstólar séu notaðir til að kefla þolendur ofbeldis, múlbinda þá sem berjast gegn því og kæfa í fæðingu þá vitundarvakningu sem hefur átt sér stað um kynferðislegt ofbeldi undanfarin misseri. Ég ætla að gefa í málfrelsissjóðinn. Ég vona að þú gerir það líka“
#Karolinafund sjóðsins má finna hér:https://www.karolinafund.com/project/view/2511
