„Íbúar á Akureyri og Egilsstöðum geta því óhræddir sett stuttbuxurnar í þvott á laugardag og dregið þykkari föt fram úr geymslunni,“ segir Einar Sveinbjörnsson veðurfræðingur á vef sínum, Blika.is.
Mjög hlýtt hefur verið í veðri á norðan- og norðaustanverðu landinu síðustu daga og er útlit fyrir að hiti fari í um 25 gráður austanlands í dag. Hiti fór í 23 gráður á Hallormsstað í gær og 22,7 gráður á Akureyri. Í dag og á morgun verður áfram svipaður hiti en svo fer að kólna hressilega.
„Skjótt skipast veður í lofti. Spár gera ráð fyrir að vestanáttin með hlýja loftinu víki fyrir norðaustan átt með kólnandi veðri á laugardag. Á sunnudag og mánudag er svo spáð hita um og undir 5 gráðum á láglendi norðan- og austanlands. Kuldanum fylgja svo skúrir eða slydduél og jafnvel snjókoma til fjalla eins og spáin á Bliku fyrir Fjarðarheiði sýnir,“ segir Einar og bendir á að íbúar á þessum slóðum geti óhikað farið að leggja stuttbuxurnar til hliðar – í bili að minnsta kosti.
„Spám ber ekki saman um það hversu langt fram í vikuna kuldakastið á að standa, en ætli flestir voni ekki að því ljúki fljótt og að hægt verði að nota stuttbuxurnar aftur von bráðar.“