Donald Trump Bandaríkjaforseti hefur neitað ásökunum rithöfundarins E Jean Carroll um að hann hafi nauðgað henni um miðjan tíunda áratuginn. Ásakanirnar setur Carroll fram í nýrri bók sinni. Nokkrir dagar eru síðan Trump neitaði ásökununum en ummæli um málið sem höfð eru eftir honum í fjölmiðlum í dag hafa vakið mikla athygli. Þar teflir hann fram sem einni röksemd gegn ásökunum Carroll að hún sé ekki „mín týpa.“ Trump sagði þetta í viðtali við fjölmiðilinn The Hills en The Independent tekur málið upp ásamt fleiri fjölmiðlum.
Carroll heldur því fram að Trump hafi nauðgað henni inni í mátunarklefa í Bergdorf Goodman versluninni á Manhattan árið 1995 eða 1996. Carroll segist hafa varist árás Trumps af krafti en honum hafi tekist að koma nærbuxum hennar og að líkindum þrengja sér inn í leggöng hennar eitt augnablik áður en henni tókst að flýja af vettvangi.
Eftirfarandi er haft eftir Trump um málið í dag:
„Ég veit ekkert um þessa konu. Ég veit ekkert um hana. Hún er – það er bara hræðilegt að fólk geti komið með svona yfirlýsingar.“ Áður hafði Trump neitað því að hafa nokkurn tíma séð Carroll en svo kom í ljós gömul ljósmynd sem sýnir þau bæði saman. Trump segir enn fremur:
„Ég segi þetta með mikilli virðingu: Númer eitt, hún er ekki mín týpa. Númer tvö: Þetta gerðist aldrei. Þetta gerðist aldrei. Ok?“