Maður var í gær dæmdur í Héraðsdómi Reykjavíkur fyrir margvísleg brot, meðal þeirra að hafa í félagi við annan mann, sumarið 2017, ógnað þremur 13 ára drengjum með exi. Með „því beitti ákærði þeim ógnunum og sýndi þeim yfirgang og ruddalegt athæfi, “ segir í ákæru.
Þá var maðurinn ákærður fyrir að hafa skömmu áður verið með í vörslu sinni hníf við tjónaskoðun VÍS að Smiðshöfða 3, en lagt var hald á vopnið.
Maðurinn var einnig ákærður fyrir innbrot í þrjú sumarhús þaðan sem miklum verðmætum var stolið. Einnig fyrir að hafa haft í vörslu sinni plötuspilara sem stolið var úr félagsheimilinu Skagaseli í Skagafirði og haglabyssu sem stolið var úr sumarhúsi í Skagafirði.
Ennfremur var maðurinn ákærður fyrir umferðarlagabrot.
Maðurinn játaði brot sín, sem flest eru orðin tæplega tveggja ára gömul, skýlaust fyrir dómnum og var hann sakfelldur. Fékk hann vægan dóm: Hann var sviptur ökuréttindum í 16 mánuði og dæmdur í 60 daga skilorðsbundið fangelsi.