„Framlag Íslands til mannúðarmála í Kóreustríðinu 1951 var matarolía að verðmæti $45400 USD.“ Þetta segir ‎Smári McCarthy‎, þingmaður Pírata, innan Facebook-hópsins Algjörlega óáhugaverðar stjórnmálaupplýsingar. Hópurinn er nokkuð vinsæll meðal íslenskra stjórnmálamanna og hafa nokkrar umræður sprottið úr þessu innleggi Smára.

Andrés Ingi Jónsson, þingmaður VG, bendir á að þetta hafi verið lýsi en ekki matarolía og vísar í frétt frá þessum tíma. „Í byrjun þessa mánaðar var samþykkt á fundi ríkisstjórnarinnar að leggja fram 125 tonn af þorskalýsi til nauðstaddra barna í Kóreu og skoðast lýsið sem beint framlag til Sameinuðu þjóðanna frá Ríkisstjórn Íslands,“ segir í þeirri frétt.

Smári svarar þessu og veltir fyrir sér hvort Kóreumenn hafi í raun eldað upp úr lýsinu. „Sumsé, einhver hélt að það væri góð hugmynd að steikja upp úr lýsi? Eða hefur 식용유 breiðari merkingu? Úff. Þetta jaðrar við að vera áhugavert,“ spyr Smári.

Andrés svarar til baka: „Eins og fólk hafi ekki þurft að þola nóg, þá hafi það fengið stirfry með lýsisbragði?“ Alexandra Bríem, varaborgarfulltrúi Pírata í Reykjavík, bætir við þetta: „Það gæti nú allt eins talist stríðsglæpur ef við gerðum þeim það.“ Unnar Þór Sæmundsson, gjaldkeri Pírata, segir engan vafa á því: „Alexandra ég er nokkuð viss um að senda 125 tonn af lýsi sem „gjöf“ er stríðsglæpur.“