„Við einfaldlega verðum að efla lögregluna og allt það kerfi sem vinnur við þennan erfiða og viðkvæma málaflokk,“ segir Inga Sæland, þingmaður og formaður Flokks fólksins.
Inga deilir frétt Vísis á Facebook-síðu sinni í dag en þar var fjallað um mikla aukningu í fjölda tilfella í málum ríkisborgara utan EES sem framvísa fölsuðum skilríkjum hér á landi með það fyrir augum að fá atvinnuleyfi. Einn slíkur, karlmaður á þrítugsaldri, var handtekinn í banka í Reykjavík í gær með fölsuð skilríki frá Rúmeníu.
Jóhann Karl Þórisson, aðstoðaryfirlögregluþjónn hjá lögreglunni á höfuðborgarsvæðinu, segir að umræddur maður hafi líklega verið frá Georgíu sem er utan EES. Rúmenía er aftur á móti innan EES og virðist maðurinn hafa ætlað að freista þess að fá kennitölu hér á landi sem EES-borgari. Maðurinn hafði komið hingað til lands á sínum tíma en verið vísað úr landi eftir að hafa dvalið á Íslandi of lengi.
Lögum samkvæmt mega ríkisborgarar utan EES koma hingað sem ferðamenn og dvelja hér í allt að þrjá mánuði. Þeir mega ekki vinna nema að undangengnu leyfi Útlendingastofnunar. Þetta þarf þó að liggja fyrir áður en viðkomandi kemur til landsins. Jóhann sagði að þetta væri í gerast í auknum mæli; menn kaupi fölsuð skilríki og komi hingað sem ferðamenn. Svo fara þeir í bankann sem sækir um kennitölu. Að þessu loknu geta menn byrjað að vinna. Jóhann sagði að margir þessara manna væru í þeim sporum að fá eina evru á tímann heima hjá sér, en hér fái þeir þrettán evrur í lágmarkslaun.
Jóhann sagði við Vísi að þessi aukning krefjist mikillar vinnu hjá lögreglu. „Við erum í rauninni nánast að drukkna í svona málum. Það komu tvö í gær og þrjú um helgina og þetta er bara endalaust.“
Inga Sæland kallar eftir því að lögreglan verði efld til að hún ráði betur og á skilvirkari hátt við mál af þessu tagi. „Fjárskortur frá hinu opinbera á aldrei að vera fyrirstaða þegar kemur að því að upplýsa um skipulagða glæpastarfssemi sem hér er að skjóta rótum.“
