Flugferðum Icelandair til landsins sem áætlaðar voru í eftirmiðdaginn hefur verið seinkað til kvöldsins. Til dæmis hefur flugi frá Kaupmannahöfn verið seinkað til kl. 22. Mjög varhugavert er að vera á ferðinni seinni part dagsins og ökuferðir eftir Reykjanesbrautinni verða sérstaklega varasamar vegna ausandi rigningar og mjög mikils hliðarvinds.
Lögreglan á höfuðborgarsvæðinu varar við veðrinu með svohljóðandi tilkynningu:
„Vekjum athygli á því að spáð er leiðindaveðri í umdæminu þennan laugardaginn, einkum síðdegis og í kvöld, eða suðaustan 13-18 og 18-23 m/s í kvöld. Þeir sem eiga leið til eða frá höfuðborgarsvæðinu ættu að hafa hugfast að það gæti orðið mjög hvasst undir Hafnarfjalli og útlit er fyrir mikinn hliðarvind á Reykjanesbraut. Á þessum slóðum má enn fremur búast við ausandi rigningu og því kunna skilyrði til aksturs að vera varasöm.“
Lögreglustjórinn á Suðurnesjum segir:
„Við viljum vekja sérstaklega athygli á því að spáð er leiðindaveðri hjá okkur í dag og í kvöld. Spáð er miklu roki og mikilli rigningu og útlit er fyrir mikinn hliðarvind á Reykjanesbraut. Á þessum slóðum má enn fremur búast við ausandi rigningu og því kunna skilyrði til aksturs að vera varasöm.
Við viljum einnig benda þeim sem eru á leið erlendis að hafa það í huga að mjög líklega verður röskun á öllu flugi.“