Margrét Friðriksdóttir frumkvöðlafræðingur og stjórnandi hins stóra Facebook-hóps Stjórnmálaspjallsins, vakti athygli fyrir nokkru er hún sagðist ætla að flytja af landi brott ef Hatari sigraði í undankeppni Eurovision á Íslandi. Margrét, sem er trúuð kristin kona, er einnig mikil stuðningsmaður Ísraels-ríkis. Í kjölfar yfirlýsingar Margrétar gaf Hatari frá sér tilkynningu þess efnis að Margrét hefði verið ráðin fjölmiðlafulltrúi hljómsveitarinnar. Þó að sú tilkynning hafi ekki virst mjög alvarleg hefur Margrét ekki neitað tíðindunum.
DV hafði samband við Margréti eftir að úrslit voru kunn í gærkvöld. Hún svaraði í morgun og upplýsti um hvort hún ætli að standa við hótun sína um að flytjast af landi brott:
„Ég er svona enn að melta þetta en úrslitin komu mér ekki á óvart þetta var afar slök keppni og hatarar með lang sterkasta lagið en ég var búin að ákveða fyrir löngu að fara til Ísrael til að horfa á keppnina og núna þar sem hatarar hafa tilnefnt mig kynningastjóra getur það orðið enn áhugaverðara, þannig það er allt opið og aldrei að vita nema ég endi bara á því að flytja til fyrirheitna landsins væri ekkert á móti því að búa þar.“