Tónlistarmaðurinn Zakarías Herman Gunnarsson er hættur í ballsveitinni Babies-flokknum. Tilkynnt var um brotthvarf Zakaríasar úr hljómsveitinni þann 19. desember síðastliðinn og var brotthvarfið sagt vera „af persónulegum ástæðum“. Raunveruleg ástæða er þó sú að fyrrverandi kærasta Zakaríasar hefur kært hann fyrir alvarlega líkamsárás. Stundin greindi fyrst frá málinu.

Tónlistarmaðurinn var handtekinn á vettvangi og samkvæmt heimildum DV var hann látinn sæta gæsluvarðhaldi um tíma. Heimildir DV herma að vitni hafi komið að Zakaríasi og kærustunni á meðan ofbeldið stóð yfir. Konan hefur lagt fram kæru vegna málsins.

Babies-flokkurinn hefur notið mikilla vinsælda sem ballsveit undanfarin ár. Sveitin spilar helst fjörugar ábreiður af verkum annarra listamanna og hefur komið fram á mánaðarlegum viðburðum á skemmtistaðnum Húrra. Orðrómur um ofbeldisfulla hegðun Zakaríasar verið á sveimi um tíma.

Í áðurnefndri frétt Stundarinnar kom fram að honum hafi verið meinað að taka þátt með hljómsveit sinni á Girl Power-tónleikum á Húrra í maí í fyrra, sem söngkonan Salka Sól Eyfeld var í forsvari fyrir. Sögusagnir um að hann hefði gerst sekur um ofbeldisfulla hegðun voru ástæða þess.