Braggamálið hefur verið mikið í fjölmiðlum undanfarið og þann 20. desember síðastliðinn gaf Innri endurskoðandi Reykjavíkurborgar út ítarlega skýrslu um málið. Í henni kemur fram að mistök ofan á mistök hafi átt sér stað á öllum stigum framkvæmdarinnar. Lög og reglur voru brotin ásamt því að ekki hafi verið fjárheimild fyrir hluta af framkvæmdinni.

Þórdís Lóa Þórhallsdóttir, formaður borgarráðs og borgarfulltrúi Viðreisnar, var gestur hjá Stóru málunum hér á DV. Hún segir að mjög mikið hafi farið úrskeiðis þegar kom að framkvæmdum að bragganum og að það hafi verið með ólíkindum að þetta skuli getað gerst. Árið 2015 gaf Innri endurskoðun Reykjavíkurborgar út svarta skýrslu um starfsemi þeirrar skrifstofu sem bar ábyrgð á framkvæmdunum lagði fram um 30 tillögur að úrbætum til að bæta stjórnsýsluna. Innri endurskoðandi segir í nýjustu skýrslu sinni að hefði verið farið að tillögum sínum hefði braggamálið aldrei átt að getað gerst.

„Hérna kemur alveg fram að fólk er störfum hlaðið, fólk er ekki að ná að halda utan um verkefnin sín. það fellur bara einhvern veginn fyrir utan kerfið á flestum sviðum og það nær að halda sér þar. Það eru greiddir út reikningar, það eru samþykktir reikningar, verkefnið breytist á þess að það sé heimild fyrir því. Þetta er í rauninni alveg með ólíkindum að þetta skuli geta gerst,“ segir Þórdís Lóa.

Blaðamaður DV settist niður með Þórdísi Lóu og fór ítarlega yfir braggamálið. Hér að neðan má sjá allt viðtalið í heild.