Þröstur Helgason, dagskrárstjóri Rásar 1, réð Jón Baldvin Hannibalsson sem verktaka á dögunum þrátt fyrir mótmæli starfsmanna. Fjöldi kvenna hefur stígið fram nýverið og lýst kynferðislegri áreitni hans, margar í Stundinni en það er þó ekki í fyrsta skiptið sem Jón Baldvin er sakaður um slíkt.
Fyrst var getið um kynferðislega áreitni Jóns Baldvins í fréttum fyrir nokkrum árum er í ljós kom að hann hafði skrifað mjög vafasöm bréf til kornungrar frænku sinnar.
Stundin greinir frá því að Jón Baldvin og eiginkona hans, Bryndís Schram, hafi verið ráðin sem verktakar á RÚV í haust. Þættinum, sem fjallar um ferðalög þeirra í Asíu, var útvarpað þar síðasta sunnudag. Heimildir Stundarinnar herma að nokkrir starfsmenn RÚV hafi mótmælt þessu í haust.
Sjá einnig: Hrafn Jökulsson segir Jón Baldvin hafa skrifað nemendum sínum í Hagaskóla ástarbréf
Þröstur Helgason dagskrástjóri viðurkennir í svari við fyrirspurn Stundarinnar að skiptar skoðanir hafi verið um ráðningu Jóns Baldvins. Hann segir að Jón Baldvin og Bryndís hafi átt frumkvæði að þáttunum. Þau hafi fengið sambærilega greiðslu og aðrir verktakar hjá RÚV.
„Dagskrá og þáttagerð á Rás 1 og öðrum miðlum RÚV byggir á ritstjórnarlegu samtali sem er bæði mikið og opið. Aðkoma Jóns Baldvins að nefndum þætti var rædd og voru skiptar skoðanir eins og um margt sem ratar á dagskrá í miðlum RÚV. Dagskrárráð Rásar 1 fjallar um dagskrá rásarinnar og ákvarðar hana en dagskráin er líka kynnt og rædd á ritstjórnarfundum rásarinnar. Jóladagskráin var sömuleiðis kynnt og rædd á opnum upplýsingafundi í byrjun desember sem var öllum starfsmönnum RÚV aðgengilegur,“ segir Þröstur.