Þrjátíu og fimm ára kona, Katy Williams, og sonur hennar, hinn þriggja ára gamli Finn, mega teljast heppin að vera á lífi eftir að hafa orðið fyrir árás gíraffa. Fjölskyldan er búsett í Suður-Afríku og átti árásin sér stað skammt frá heimili þeirra.

Eiginmaður Katy, Sam, var á leið heim úr útihlaupi á mánudag þegar hann sá eiginkonu sína og son verða fyrir barðinu á gíraffanum. Talið er að gíraffinn, sem var með ungan kálf meðferðis, hafi talið sér ógnað og ráðist á Katy og Finn. Sam tókst að hrekja gíraffann á brott en ekki fyrr en hann hafði stórslasað mæðginin.

Katy og Finn voru flutt með þyrlu á sjúkrahús og gekkst Finn meðal annars undir aðgerð til að létta á þrýstingi í höfuðkúpu hans. Að því er Mail Online greinir frá er ástand þeirra stöðugt en alvarlegt. Katy er fædd í Bandaríkjunum en Sam í Bretlandi en bæði eru vísindamenn sem starfað hafa við dýrarannsóknir í Suður-Afríku undanfarin misseri.