„Það er ekki fyrr en á efri árum að ég fæ kjarkinn til að setjast niður og segja: „þetta gerðist,“ segir tónlistarmaðurinn ástsæli Bubbi Morthens. Bubbi varð fyrir kynferðislegri misnotkun sem ungur maður og setti það mark sitt á allt hans líf.
Bubbi tjáir sig um kynferðisofbeldið í sjónvarpsþættinum Með Loga sem sýndur verður í Sjónvarpi Símans næstkomandi fimmtudagskvöld.
Hann tjáði sig einnig um þessa reynslu í útvarpsþættinum Eftir Hádegi sem fluttur var á RÚV á seinasta ári.Þar sagðist hann ennþá vera að vinna í sínum málum.
„Við sem verðum fyrir ofbeldi sem börn, þeir karlmenn verða ekki langlífir. Þeir beita aðra ofbeldi, misnota áfengi og eiturlyf, deyja úr krabbameini og skilja. Þeir verða á milli tveggja heima einhvern veginn ef þeim ber ekki gæfa til að fá hjálp og vinna úr sínum málum.“
Í ofangreindu viðtali við Loga Bergmann segir Bubbi að ofbeldið hafi breytt öllu lífi hans.
„Að verða fyrir kynferðislegu ofbeldi markar viðkomandi það sem eftir er. Ég tala nú ekki um ef þú nærð ekki að vinna úr því eða gera eitthvað í þínum málum.
Vegna þess að þetta markaði öll samskipti mín við konur. Þetta markaði öll samskipti mín við fólk almennt. Þetta eyðilagði samband mitt við sjálfan mig.“